අමෙරිකා එක්සත් ජනපදයේ දකුණු හා මධ්‍යම ආසියානු කලාප භාර සහකාර රාජ්‍ය ලේකම් ඩොනල්ඩ් ලූ මහතා මෙරට සංචාරයක නිරත වීමට නියමිතව තිබෙනවා.
මැයි 10 සිට 15 දක්වා ඉන්දියාවේ සහ බංග්ලාදේශයේ සංචාරයක නිරතව සිටින ඔහු ඉන් අනතුරුව ශ්‍රී ලංකාවට පැමිණීමට නියමිත බවයි වාර්තා වෙන්නේ.
ඇමරිකාවේ රාජ්‍ය දෙපාර්තමේන්තුවට අනුව, ඔහුගේ සංචාරය එක් එක් රටවල් සමඟ ද්විපාර්ශ්වික සහයෝගීතාව ශක්තිමත් කරනු ඇති අතර නිදහස්, විවෘත මෙන්ම සමෘද්ධිමත් ඉන්දු පැසිෆික් කලාපයක් සඳහා එක්සත් ජනපදයේ සහයෝගය පෙන්නුම් කරනු ඇති.
ඉන්දීය සංචාරය අවසන් කරමින් ශ්‍රී ලංකාවට පැමිණීමට නියමිත ඩොනල්ඩ් ලූ මහතා මෙරට සංචාරයේ නිරත වන කාල සීමාව අතරතුර දේශපාලන නියෝජිතයින් රැසක් හමු වීමට නියමිත අතර එමඟින් දෙරට අතර සබඳතා ශක්තිමත් කෙරෙනු ඇතැයි අපේක්ෂා කෙරෙනවා.
එමෙන්ම මෙම සාකච්ඡාවලදී ශ්‍රී ලංකාවේ ආර්ථික වර්ධනය වෙනුවෙන් එක්සත් ජනපදයේ සහයෝගය මෙන්ම නිදහස් හා ප්‍රජාතන්ත්‍රවාදී සමාජයක් සඳහා අත්‍යවශ්‍ය වන ශක්තිමත් සිවිල් සමාජයක වැදගත්කමද තහවුරු කෙරෙනු ඇති බවද සඳහන්.
