වාලච්චේන මහේස්ත්රාත් අධිකරණයේ නඩු භාණ්ඩ කාමරය බිඳ නඩු භාණ්ඩ ලෙස එහි තිබූ කාලේ මත්පැන් බෝතල් 200ක් පමණ සොරාගත් සැකකරුවකු වාලච්චේන පොලීසිය ඊයේ (11) අත්අඩංගුවට ගෙන තිබෙනවා.
අධිකරණයේ නඩු භාණ්ඩ ගබඩාව දෙසින් පෙරේදා (10) සවස ශබ්දයක් ඇසී අධිකරණ පරිශ්රයේ ආරක්ෂාවට යොදවා සිටි පොලිස් නිලධාරියා සහ නඩු භාණ්ඩ කාමරයේ භාරකරු විමසිලිමත් වීමේදී යම් පුද්ගලයකු තාප්පයෙන් පැන පලා යන අයුරු දැක තිබෙනවා.
එසේ අධිකරණයේ තාප්පයෙන් පැන ගිය පුද්ගලයාව හඳුනා ගැනීමට පොලිස් නිලධාරියාත් නඩු භාණ්ඩ කාමරයේ භාරකරුත් සමත්ව තිබෙනවා. එම පුද්ගලයා මත්කුඩු ලෝලියකු බවත් ඔහු මෙයට පෙරද අධිකරණයේ නඩු භාණ්ඩ කාමරය බිඳ නඩු භාණ්ඩ සොරා ගැනීමකට අත්අඩංගුවට පත්ව බන්ධනාගාරගතව ද සිට ඇප මත සිටින්නකු බවත් පොලීසිය සඳහන් කරනවා.
අධිකරණයේ නඩු භාණ්ඩ කාමරය දෙසින් ඇසුණු ශබ්දය හා තාප්පයෙන් පැන පලා ගිය පුද්ගලයා සොෙරකු වූ බැවින් නඩු භාණ්ඩ කාමරය පරීක්ෂා කිරීමේදී මුලින්ම පෙනී ගොස් ඇත්තේ කාලේ මත්පැන් බෝතල් 25ක් අඩංගු පෙට්ටියක් අතුරුදන්ව ඇති බවයි.
ඒ සම්බන්ධයෙන් නඩු භාණ්ඩ කාමරයේ භාරකරු පොලීසියට පැමිණිල්ලක් කර ඇත. ඒ ගැන වැඩිදුර විමර්ශනයේදී හෙළිවී ඇත්තේ නඩු භාණ්ඩ ලෙස තිබුණු කාලේ මත්පැන් බෝතල් 200ක් පමණ සොරාගෙන ඇති බවයි.
මෙම සොරකම සම්බන්ධයෙන් සැකකරු අත්අඩංගුවට ගෙන ඇති බවත් ඔහු අධිකරණයේ තාප්පයෙන් පැන පලා ගිය පුද්ගලයා බවත් පොලීසිය සඳහන් කරනවා.
