කුරුණෑගල මහ නගර සභාවට අයත් කුරුණෑගල නගරයේ පිහිටි තෙමහල් වෙළඳ සංකීර්ණයේ තුන්වන මහලේ ආරම්භ කර තිබෙන පුද්ගලයන් ලියාපදිංචි කිරීමේ දෙපාර්තමේන්තුවට අයත් කාර්යාලයට ජනතාවට පහසුවෙන් ගමන් කළ නොහැකි තත්ත්වයක් නිර්මාණයවී ඇති බවට පුවතක් වාර්තා වෙනවා.
‘දිවයින’ වාර්තා කරන්නේ මේ හේතුවෙන් ජනතාව එම කාර්යාලයෙන් සේවා ලබාගැනීමට මැලිකමක් දක්වන බවයි.
තෙමහල් වෙළඳ සංකීර්ණයේ පැවැත්වෙන රජයට අයත් මෙම කාර්යාලයට ආබාධිත පුරවැසියන්ට මෙන්ම වයෝවෘධ සහ විවිධ රෝගාබාධ සහිත පුරවැසියන්ට සහ ගැබිනි මාතාවන්ට පහසුවෙන් ළඟාවිය නොහැකිවීම නිසා ඔවුන්ගේ අවශ්‍යතා ඉටුකර ගැනීමට නොහැකි වීමෙන් ඔවුන් රජයේ වගකිව යුත්තන්ට දැඩි අප්‍රසාදය පළ කරනවා.
දීර්ඝ කාලයක් තිස්සේ මෙම විදුලි සෝපානය ක්‍රියාවිරහිත වී තිබීම සම්බන්ධයෙන් කුරුණෑගල මහ නගර සභාවේ වගකිව යුත්තන් කිසිවකු අවධානය යොමු කර නොමැති බවට එම ජනතාව චෝදනා කරනවා.
එමෙන්ම, මහල් තුනක් සහිත මෙම වෙළඳ සංකීර්ණයේ වෙළඳසැල් හිමියන් නියමිත බදු මුදල් නිසිපරිදි ගෙවන බවත් පාරිභෝගිකයන් විදුලි සෝපානය ක්‍රියාවිරහිතවීම නිසා භාණ්ඩ මිලදී ගැනීම ඉතාමත් මන්දගාමී බවත් ඇතැම් දිනවලදී එකම භාණ්ඩයක්වත් අලෙවි නොවන බව වෙළඳ සැල් හිමියන් පවසනවා.
