පළාත් පාලන මැතිවරණය සඳහා එජාපය හා සජබ එක්ව නාම යෝජනා ලැයිස්තු පිළියෙල කිරීමට හැකි මට්ටමක් දක්වා පක්ෂ දෙක අතර පවතින සාකච්ඡා ඉදිරියට ගෙනයෑම මූලික අරමුණ බව එජාප මහ ලේකම් තලතා අතුකෝරළ මහත්මිය පැවසුවාය.
දෙපාර්ශ්වය එකතු වීම සම්බන්ධයෙන් පවත්වන සාකච්ඡා සාර්ථක මට්ටමකට පැමිණ තිබෙන බවත් නායකත්වය හා ලාංඡනය පිළිබඳව මෙතෙක් සාකච්ඡාවට බඳුන් වී නොමැති බවත් ඇය කීවාය.
ඊයේ (30) මහනුවර දී පැවති මාධ්ය හමුවේ දී අදහස් දක්වමින් තලතා අතුකෝරළ මහත්මිය පැවසුවේ ඇතැම්විට පළාත් පාලන මැතිවරණයට පොදු ලාංඡනයකින් ඉදිරිපත් විය හැකි බවයි.
“ නායකත්වය හා ලාංඡනය සම්බන්ධ ප්රශ්න පස්සේ බේරාගන්න පුළුවන්. අපි මේ සාකච්ඡා කරන්නේ එජාපයේම තව කොටසක් සමඟයි. එජාපයෙන් කැඩිලා ගිය එජාප පාක්ෂිකයන් තමයි සජබෙත් ඉන්නේ. මේ කණ්ඩායම් දෙකට දැන් නායකයෝ දෙන්නෙක් ඉන්නවා.
පක්ෂ දෙක එකතු විය යුතුයි කියන ස්ථාවරයේ පාක්ෂිකයෝ ඉන්නවා. ඒ සඳහා අපි ආරම්භයක් ගෙන තිබෙනවා. ඉදිරියේ දී ගැටලු මතුවන ආකාරය අනුව ඒ ගැන කතා කරනවා. නායකත්වය ගැන කතා කරන්න තරම් අපි දුරක් ඇවිත් නැහැ.
සාකච්ඡා සඳහා පක්ෂ දෙකේ නායකයන්ගේ පූර්ණ ආශීර්වාදය ලබා දී තිබෙනවා. ඇතැම්විට අපි පළාත් පාලන මැතිවරණයට ඉදිරිපත් වන්නේ පොදු ලාංඡනයකින් වෙන්නත් පුළුවන්” යැයි ද ඇය වැඩිදුරටත් කීවාය.
