රජයේ මුදල් වැය කරමින්, ප්රමිතියෙන් තොර මානව ප්රතිදේහ (Human Immunoglobulin) එන්නත් මිලදී ගැනීමේ සිද්ධිය සම්බන්ධයෙන් හිටපු සෞඛ්ය අමාත්ය කෙහෙළිය රඹුක්වැල්ල මහතා ඇතුළු විත්තිකරුවන් 12 දෙනෙකුට එරෙහිව නීතිපතිවරයා විසින් පවරා ඇති නඩුවේ පූර්ව නඩු විභාග සම්මන්ත්රණය, නොවැම්බර් මස 26 වන දා ආරම්භ කිරීමට කොළඹ ත්රිපුද්ගල මහාධිකරණය අද (06) නියෝග කළේය.
ප්රියන්ත ලියනගේ, විරාජ් වීරසූරිය සහ තිලක රත්නබණ්ඩාර යන මහත්වරුන්ගෙන් සමන්විත ත්රිපුද්ගල විනිසුරු මඩුල්ල ඉදිරියේ මෙම නඩුව අද කැඳවනු ලැබීය.
නඩුව කැඳවූ අවස්ථාවේදී, දෙවන විත්තිකරු වන කපිල වික්රමනායක මහතා වෙනුවෙන් පෙනී සිටි ජ්යෙෂ්ඨ ජනාධිපති නීතිඥවරයා, තම සේවාදායකයාට නාවල විවෘත විශ්වවිද්යාලයේ පැවැත්වෙන විභාගයකට සහභාගී වීමට ඇති බැවින් අධිකරණයෙන් පිටව යාමට අවසර ඉල්ලා සිටියේය. විනිසුරු මඩුල්ල එම ඉල්ලීමට අවසර ලබා දුන්නේය.
ඒ අනුව, නඩුවේ ඉදිරි කටයුතු සම්බන්ධයෙන් වන පූර්ව නඩු විභාග සම්මන්ත්රණය නොවැම්බර් 26 වන දා ආරම්භ කිරීමට අධිකරණය දින නියම කළේය.
