හිරියාල විවිධ සේවා සමුපකාර සමිතියේ මහා සභාවේ සාමාජිකයන් පිරිසක් සමිතියේ මුදල් රුපියල් එක්කෝටි දහහත් ලක්ෂයක් වියදම් කර උතුරු ඉන්දියාවේ සංචාරයකට යෑමේ සිද්ධියක් සම්බන්ධයෙන් වයඹ පළාත් ආණ්ඩුකාරවරයාගේ නියමයෙන් විශේෂ විමර්ශනයක් ආරම්භ කර තිබේ.
ඉබ්බාගමුව සමුපකාර සමිතියේ සාමාජිකයන් පිරිසක් විසින් කරන ලද පැමිණිල්ලක් සැලකිල්ලට ගෙන ආණ්ඩුකාර තිස්ස වර්ණසූරිය මහතා මේ ක්රියාව සම්බන්ධයෙන් විමර්ශනයක් පවත්වන ලෙස වයඹ පළාත් සමුපකාර සංවර්ධන කොමසාරිස්වරයාට උපදෙස් දී ඇත.
මෙම සංචාරය සඳහා මහා සභා අනුමැතිය යටතේ සමුපකාර සමිතියට අයත් ග්රාමීය බැංකු අරමුදලින් ප්රථමයෙන් රුපියල් කෝටියක මුදලක් වෙන් කරගෙන තිබෙන බව ද පසුව එම මුදල ප්රමාණවත් නොවීම හේතුවෙන් නැවත ලක්ෂ 17ක මුදලක් වෙන් කරගෙන ඇති බව ද වාර්තා වේ.
නමුත් නිසි පරිදි මහා සභා අනුමැතියකින් තොරව දෙවැනි වරට ලක්ෂ 17ක මුදල වෙන් කරගෙන ඇති බව ද පැවසේ. මෙම මුදල් සමිතියේ ලාභාංශ ලෙස සඳහන් කරමින් ලබාගෙන ඇති බව ද කියයි.
වයඹ සමුපකාර ක්ෂේත්රයේ ආරංචි මාර්ග සඳහන් කරන ආකාරයට එම සංචාරයට සහභාගි වූ පිරිසේ ගමන් වියදමට අමතරව වෙනත් පෞද්ගලික වියදම් වෙනුවෙන් ද සමුපකාර සමිතියට අයත් මෙපමණ විශාල මුදලක් ලබා ගෙන ඇති බව කියයි.
මෙම ඉන්දීය සංචාරය සඳහා හිරියාල විවිධ සේවා සමුපකාර සමිතියේ මහා සභාවේ සාමාජිකයන් 29 දෙනකු සහභාගි කරවා ගෙන ඇත. දෙවැනි වරට ලබාගත් රුපියල් ලක්ෂ 17ක මුදල අනුමත කර ගැනීම සඳහා අද (31) දිනයේ මහා සභා රැස්වීමක් කැඳවා තිබුණ ද එම රැස්වීම නොපවත්වාම අදාළ මුදල ලබා ගෙන මෙම පිරිස පසුගිය 28 වැනි දිනයේ ඉන්දියාව බලා ගොස් ඇති බව ද වාර්තා වේ. මේ අනුව සංචාරය සඳහා එක් සාමාජිකයකුට වෙන් වී ඇති මුදල රුපියල් ලක්ෂ 4 ඉක්මවයි.
