කුරුණෑගල, කහපත්වෙල ප්‍රදේශයේ පදිංචි 44 හැවිරිදි රියදුරකු නීති විරෝධීව අත්අඩංගුවට ගෙන වධහිංසා කළැයි කියන සිද්ධියක් සම්බන්ධයෙන් සුරාබදු නිලධාරීන් පිරිසකට එරෙහිව පැවරූ මූලික අයිතිවාසිකම් පෙත්සමක් විභාගයට ගැනීමට ශ්‍රේෂ්ඨාධිකරණය ඊයේ (29) තීන්දු කර තිබෙනවා.
සුරාබදු නිලධාරීන් වන ඩබ්ලිව් ඒ ආර් රත්නසේකර, බී ජී ජී අනිල් කුමාර නඩුවේ පළමු සහ දෙවැනි වගන්තරකරුවන්ට එරෙහිව කෘර, අමානුෂික සහ අවමන් සහගත සැලකීමෙන් මිදීමේ අයිතිවාසිකම කඩ කිරීම සම්බන්ධයෙනුත්, කුරුණෑගල සහකාර සුරාබදු කොමසරිස්, සුරාබදු කොමසාරිස් ජනරාල් සහ නීතිපති යන හතර පහ සහ හය වැනි වගඋත්තරකරුවන්ට අත්තනෝමතික ලෙස සිර භාරයට ගැනීමෙන් මිදීමේ අයිතිවාසිම කඩ කිරීම සම්බන්ධයෙනුත් මෙම නඩුව පවත්වාගෙන යෑමට එහිදී ශ්‍රේෂ්ඨාධිකරණය නියෝග කළා.
අගවිනිසුරු ජයන්ත ජයසූරිය මහතා ප්‍රමුඛ ත්‍රිපුද්ගල විනිසුරු මඩුල්ලක් ඉදිරියේ ඊයේ (29) නඩුව කැඳවූ අවස්ථාවේදීය මෙම නියෝගය ලබා දී තිබුණා.
නීතිඥ සුරේන් ඩී පෙරේරා මහතාගේ උපදෙස් පිට නීතිඥ මාධව ඊරියගම සහ නීතිඥ මනුෂිකා කුරේ සමග නීතිඥ චාරක ධර්මසිරි මහතා අධිකරණය ඉදිරියේ පෙනී සිට පෙත්සම්කරු වෙනුවෙන් කරුණු දක්වනු ලැබුවා.
මේ අතර, මෙම නඩුවේ තුන්වැනි වගඋත්තරකාර සුරාබදු නිලධාරියා මේ වන විට මිය ගොස් ඇතැයි නීතිපති දෙපාර්තමේන්තුව අධිකරණයට දැනුම් දුන්නා.
නීතිපති දෙපාර්තමේන්තුව තවදුරටත් සඳහන් කළේ වගඋත්තරකාර සුරාබදු නිලධාරීන් වෙනුවෙන් පෙනී සිටින්නේද යන්න ගැන ඉදිරි නඩු දිනයේ දී දැනුම් දෙන බවයි.
