ගිණුම් පරීක්ෂකවරුන්ගේ (Auditors) බරපතළ අනතුරු ඇඟවීම් හේතුවෙන් කොළඹ කොටස් වෙළෙඳපොළේ (CSE) නිරීක්ෂණ ලැයිස්තුවට (Watchlist) ඇතුළත් කර ඇති Softlogic Holdings සහ එහි ප්රධාන වෙළෙඳ ජාලය වන Odel සමාගම, එම මූල්ය කඩාවැටීමෙන් ගොඩඒම සඳහා දියත් කර ඇති දැවැන්ත ව්යුහාත්මක ප්රතිසංස්කරණ මාලාවක නවතම තත්ත්වයන් ඊයේ (03) නිල වශයෙන් ප්රකාශයට පත් කර තිබේ.
ව්යාපාර අඛණ්ඩව පවත්වාගෙන යාමේ අවදානම (Ongoing concern) හේතුවෙන් කළු ලැයිස්තුවට වැටුණු මෙම සමාගම් ද්විත්වයට එම ගැටලු විසඳා ගැනීමට මාස 15ක සහන කාලයක් හිමිව ඇත.
Odel ජාලයේ දැඩි පිරිවැය පාලනය සහ දේපළ විකිණීම Softlogic සමූහයට 98.79%ක අයිතියක් ඇති Odel සමාගම, සිය බැංකු ණය පහසුකම්වලින් 90%ක්ම ප්රතිව්යුහගත කිරීමට පියවර ගෙන ඇති අතර මූල්ය පීඩනය අවම කරගැනීමට දැඩි තීන්දු රැසක් ගෙන ඇත.
Odel සතු කොස්වත්ත ප්රදේශයේ පිහිටි වටිනා ඉඩම් කොටසක් රුපියල් බිලියන 1.5කට (කෝටි 150ක) මුදලට විකුණා දමා ඇති අතර, සමාගම් අභ්යන්තරව ලබාගෙන තිබූ රුපියල් බිලියන 3.2ක ණය මුදලක් කොටස් ප්රාග්ධනයක් (Equity) බවට පරිවර්තනය කර තිබේ.
දිගින් දිගටම පාඩුවැති වූ Odel සන්නාමය යටතේ පැතිර තිබූ වෙළෙඳසැල් 26ක් මුළුමනින්ම වසා දමා ඇත. මීට අමතරව, කලින් රුපියල් බිලියන 19.35ක් ලෙස ඇස්තමේන්තු කර තිබූ දැවැන්ත ‘ඔඩෙල් මෝල්’ (Odel Mall) ව්යාපෘතියේ පිරිවැය රුපියල් බිලියන 6.28 දක්වා සීමා කිරීමට පාලනාධිකාරිය තීරණය කර තිබේ.
ප්රාග්ධන මුදල් සපයා ගැනීම සඳහා සැලසුම් කර ඇති රුපියල් බිලියන 10ක කොටස් නිකුතුවෙන් දැනටමත් බිලියන 2.03ක් උපයාගෙන ඇති අතර, ලබන සැප්තැම්බර් මාසය වන විට තවත් බිලියන 1.2ක් බලාපොරොත්තු වන බව සමූහය පවසයි.
2026 මාර්තු 31න් අවසන් වූ මූල්ය වර්ෂය සඳහා Softlogic සමූහයේ සමස්ත ආදායම 24%කින් ඉහළ ගොස් රුපියල් බිලියන 128.4ක වාර්තාගත මට්ටමකට පැමිණ ඇති අතර, බදු පෙර ආදායම (EBITDA) 55%කින් (බිලියන 16 දක්වා) වර්ධනය වී ඇත. ‘Minor Hotel’ NH’ ලෙස ප්රතිසන්නාමකරණය කළ හෝටල් ක්ෂේත්රයේ පාඩුව ද බිලියන 3.7 සිට 2.3 දක්වා අඩු කරගැනීමට සමූහය සමත් වී තිබේ.
ආදායම් වර්ධනය වුවද, පසුගිය වසරට වඩා 42%ක ඉහළ යාමක් පෙන්වමින් සමූහයේ ශුද්ධ පාඩුව රුපියල් බිලියන 8.79ක් (කෝටි 879ක්) ලෙස සටහන් වේ. තවද, සමූහය සතුව රුපියල් බිලියන 45.99ක දිගුකාලීන පොලී සහිත ණය සහ රුපියල් බිලියන 43.67ක ජංගම මූල්ය වගකීම් පවතින බව මූල්ය වාර්තා පෙන්වා දෙයි.
මෙම නිවේදනත් සමඟ අද දින කොටස් වෙළෙඳපොළ වසා දමන විට Softlogic Holdings කොටසක මිල 1.71%කින් පහළ බැස රුපියල් 11.50ක් ලෙසත්, Odel කොටසක මිල 2.54%ක වර්ධනයක් සමඟ රුපියල් 12.10ක් ලෙසත් සටහන් විය.
(TheLeader.lk පුවතක් ඇසුරෙන් )
