මැයි දිනයට ක්‍රියාත්මක කොළඹ විශේෂ වැඩපිළිවෙල මෙන්න

මැයි දින රැළි සහ පෙළපාළි හේතුවෙන් අද(01) දිනය තුළ කොළඹ විශේෂ රථ වාහන සැලැස්මක් ක්‍රියාත්මක කර ඇති බව පොලිසිය පවසනවා.

ඒ අනුව ආරක්ෂාව සඳහා පොලිස් නිලධාරීන් 10,000ක් යොදවා ඇති බවයි පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව මහතා සඳහන් කරන්නේ.

පෙළපාළි සඳහා ජනතාව රැගෙන එන විනය විරෝධී බස්රථ රියදුරන් සම්බන්ධයෙන් දැඩිව නීතිය ක්‍රියාත්මක කරන බවද පොලිසිය පවසනවා.

කටුනායක ගුවන්තොටුපොළ වෙත ගමන්කරන වාහන සහ ගිලන් රථ, රෝහල් වෙත රෝගීන් රැගෙන යන රථ සඳහා මාර්ගයේ ගමන්කිරීම සඳහා පහසුකම් සපයා ඇති බවයි වාර්තා වන්නේ.

මැයි දිනයට සමගාමීව ත්‍රිවිධ හමුදා ප්‍රධානීන් ඒකාබද්ධව 1,600 කට ආසන්න භට සංඛ්‍යාවක් අදාළ කදවුරුවල පොරොත්තු සේවයේ තැබීමටත් සියලු කටයුතු සුදානම් කර ඇති බවයි පොලිසිය වැඩිදුරටත් සඳහන් කරන්නේ.