බස්නාහිර සහ සබරගමුව පළාත්වලටත් මහනුවර සහ නුවරඑළිය දිස්ත්‍රික්කවල ඇතැම් ස්ථානවලටත් අද (22) දිනයේ මිලිමීටර් 150ක පමණ තද වැසි ඇති විය හැකි බව කාලගුණ විද්‍යා දෙපාර්තමේන්තුව පවසයි.
එම දෙපාර්තමේන්තුව සඳහන් කළේ, වයඹ පළාතේත් මන්නාරම ගාල්ල සහ මාතර දිස්ත්‍රික්කවලටත් මිලිමීටර් 100ක තද වැසි ඇතිවිය හැකි බවයි.
මධ්‍ය කඳුකරයේ බටහිර බෑවුම් ප්‍රදේශවලට හා දකුණු පළාතේත් විටින් විට පැයට කිලෝමීටර් 40 -50 ත් දක්වා තද සුළං ඇතිවිය හැකි අතර දිවයිනේ සෙසු ප්‍රදේශවල සුළගේ වේගය ද පැයට කිලෝමීටර් 30 – 40 ත් දක්වා ඉහළ යා හැකි බව කාලගුණ අනාවැකියේ සඳහන් විය.
තද සුළං හා අකුණු මගින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස ද කාලගුණ විද්‍යා දෙපාර්තමේන්තුව ජනතාවට දැනුම් දෙයි.
මේ අතර වර්ෂාවත් සමග දිස්ත්‍රික්ක 9කට පැන වූ නායයෑමේ පූර්ව අනතුරු ඇඟවීමේ නිවේදනය අද (22) පස්වරුව දක්වා දීර්ඝ කර තිබේ.
බදුල්ල, කොළඹ, ගම්පහ, කළුතර, මහනුවර, කෑගල්ල, ගාල්ල , කුරුණෑගල සහ රත්නපුර දිස්ත්‍රික්කවල ප්‍රාදේශීය ලේකම් කොට්ඨාස රැසක නායයෑම් පිළිබඳ අනතුරු ඇඟවීමේ නිවේදනය බලාත්මකයි.
