රජයේ වෛද්‍ය නිලධාරීන්ගේ සංගමයේ නව සභාපතිවරයා ලෙස රාගම ශික්ෂණ රෝහලේ ළමා රෝග විශේෂඥ වෛද්‍ය සංජිව තෙන්නකෝන් සහ නව ලේකම්වරයා ලෙස වෛද්‍ය ප්‍රභාත් සුගතදාස මහත්වරු ඒකමතිකව තෝරා පත් කරගෙන තිබෙනවා.
සංගමයේ 97 වැනි සභාපතිවරයා සහ ලේකම්වරයා ලෙස සංගමයේ සාමාජිකත්වය විසින් පෙරේදා (29) දිනයේ දී මෙම ධුරයන් තෝරා පත්කර ගෙන තිබුණා.
සංගමයේ ව්‍යවස්ථාවට අනුව මෙම තෝරා පත් කර ගැනීම් සිදු කර තිබුණා.
වෛද්‍ය ප්‍රභාත් සුගතදාස මහතා කොළඹ ජාතික රෝහලේ සේවයේ නියුතු අතර, විශේෂඥ වෛද්‍ය සංජීව තෙන්නකෝන් මහතා රාගම ශික්ෂණ රෝහලේ සේවයේ නියුතුව සිටිනවා.
සංගමයේ ඉදිරි කටයුතු ව්‍යවස්ථාවට අනුකූලව විනිවිඳභාවයකින් යුතුව කරගෙන යාමටත්, සංගමයේ සාමාජිකත්වයේ ගැටලු හා ඔවුන්ගේ අයිතිවාසිකම් ලබාදීමට මෙන්ම රෝගී ජනතාවට වඩාත් යහපත් සෞඛ්‍ය සේවාවක් උරුමකර දීම සංගමයේ අපේක්ෂාව බව නව නිලධාරීන් සඳහන් කරනවා.
වෘත්තීය සමිති ක්‍රියාමාර්ගයන්ට අවතීර්ණ වීම හැකි පමණ අවම කරමින් සාකච්ඡා මාර්ගයෙන් අවශ්‍ය ගැටලු විසඳා ගැනීමට සැලසුම් කරන බවද ඔවුන් පවසනවා.
සංගමයේ හිටපු සභාපති විශේෂඥ වෛද්‍ය දර්ශන සිරිසේන සහ ලේකම් වෛද්‍ය හරිත අලුත්ගේ මහත්වරු සංගමයේ ව්‍යවස්ථාවට අනුකූලව පසුගියදා සිය තනතුරුවලින් ඉවත් වී තිබුණා.
