මෙරට ජාතික ගුවන් සේවය වන ශ්රීලංකන් ගුවන් සේවය මිල දී ගැනීම සඳහා කැඳවන ලද අභිලාෂයන් වෙත කැමැත්ත පළ කර ඇති ආයෝජකයින් 6 දෙනෙකුගේ නම් අද (22) අනාවරණය කර තිබෙනවා.
මුදල්, ආර්ථික ස්ථායීකරණ සහ ජාතික ප්රතිපත්ති අමාත්යාංශය යටතේ ක්රියාත්මක රාජ්ය ව්යවසාය ප්රතිව්යූහගත කිරීමේ ඒකකය විසින් නිකුත් කර ඇති මාධ්ය නිවේදනයක මේ බව දැක්වෙනවා.
එම නිවේදනයට අනුව, ශ්රීලංකන් ගුවන් සේවය මිල දී ගැනීම සඳහා කැඳවන ලද අභිලාෂයන් වෙත කැමැත්ත පළ කර ඇති ආයතන අතරට මෙරට සුප්රසිද්ධ ව්යාපාරිකයෙකු වන ධම්මික පෙරේරාගේ Hayleys PLC ආයතනය ද ඇතුළත්ව තිබෙනවා.
රාජ්ය ව්යවසාය ප්රතිව්යූහගත කිරීමේ ඒකකය දැනුම් දෙන්නේ ඊට අමතරව, AirAsia Consulting Sdn. Bhd., Dharshaan Elite lnvestment Holding (Pvt) Ltd, FITS Aviation (Private) Limited, Sherisha Technologies Private Limited, Treasure Republic Guardians Limited යන ආයතනද ඒ සඳහා කැමැත්ත පළ කර ඇති බවයි.
Hayleys PLC යනු මෙරට විවිධාංගීකරණය වූ ක්ෂේත්රයන් හි නිරත දැවැන්ත සමාගම් සමූහයක් වන අතර එහි පාලක කොටස් හිමියා වන්නේ ප්රකෝටිපති ව්යාපාරික ධම්මික පෙරේරා මහතායි.
Hayleys PLC හි කොටස් ප්රාග්ධනයෙන් 51.01% ක හිමිකාරීත්වය ධම්මික පෙරේරා මහතා සතු වෙනවා.
