කොළඹ නෙළුම් කුලූනේ අවන්හලක පැවැති සාදයක් අතරතුර කිසියම් මත්ද්රව්යයක් පානය කර සිටියදී, හදිසියේම රෝගීවි කොළඹ ජාතික රෝහලට ඇතුළත් කළ තරුණයකු සහ තරුණියක මියයෑමේ සිද්ධියක් සම්බන්ධයෙන් මරදාන පොලිසිය පුළුල් පරීක්ෂණයක් ආරම්භ කර තිබෙන බව දිවයින පුවත්පත වාර්තා කරනවා.
මෙලෙස මියගොස් ඇත්තේ රූපලාවන්යාගාරයක කළමනාකාරිනියක ලෙස සේවය කළ මුල්ලේරියාව උඩුමුල්ල පදිංචිව සිටි හෙට්ටිආරච්චි රසාංගිකා රුක්ෂානි නමැති 27 හැවිරිදි තරුණියක සහ දෙහිවල පදිංචිව සිටි සමිඳු ටිරංග ප්රනාන්දු නමැති 22 හැවිරිදි තරුණයකු බව පරීක්ෂණ සිදුකරන ජ්යෙෂ්ඨ පොලිස් නිලධාරියෙක් සඳහන් කර තිබෙනවා.
මෙම මත්ද්රව්ය පානය කර රෝගාතුරව ඇදවැටී ඇති දෙදෙනා එම ස්ථානයේ සිටි පිරිස් විසින් කොළඹ ජාතික රෝහලට ඇතුළත් කර ඇති අතර පසුව ප්රතිකාර ලබමින් සිටියදී ඔවුන් මියගොස් තිබෙන බවයි සඳහන් වන්නේ.
මියගිය දෙදෙනාගේ මූලික මහෙස්ත්රාත් පරීක්ෂණ මාලිගාකන්ද මහෙස්ත්රාත්වරයා විසින් සිදුකරන ලද අතර මියගිය දෙදෙනාගේ පශ්චාත් මරණ පරීක්ෂණ කොළඹ අධිකරණ වෛද්ය නිලධාරී කාර්යාලයේදී සිදුකර එම වාර්තා ඉදිරිපත් කරන ලෙසට පොලිසියට නියෝග කර තිබෙනවා.
මේ අතර සිය දියණියගේ මරණය සැක සහිත බව, මියගිය තරුණියගේ මව වන දෝන රසිකා නිලන්ති පොලිසියට ප්රකාශ කර තිබෙන බවත් එම සාදයේදී මියගිය රසාංගිකා ඇතුළු හත්දෙනකු කිසියම් මත්ද්රව්යයක් පානය කළ බවට ඇයගේ පෙම්වතා බව කියන තරුණයකු ප්රකාශ කළ බවත් පොලිසිය පවසන බව සඳහන්.
