රාජ්ය සේවයේ පවතින වැටුප් විෂමතා සහ විශ්රාමිකයන් මුහුණ දෙන ගැටලු නිරාකරණය කිරීමේ අරමුණින්, තෙල්ගේ අශෝක පීරිස් මහතාගේ ප්රධානත්වයෙන් යුත් සාමාජිකයන් 15 දෙනකුගෙන් සමන්විත නව වැටුප් හා විශ්රාම වැටුප් කොමිෂන් සභාවක් ජනාධිපති අනුර කුමාර දිසානායක මහතා විසින් ගැසට් නිවේදනයක් මගින් ස්ථාපිත කර තිබේ. ආණ්ඩුක්රම ව්යවස්ථාවේ 33 වන ව්යවස්ථාවෙන් ජනාධිපතිවරයා වෙත පැවරී ඇති බලතල ප්රකාරව මෙම පත් කිරීම සිදු කර ඇති අතර, මෙරට රාජ්ය සේවයේ ව්යුහාත්මක ප්රතිසංස්කරණ සඳහා පියවර ගැනීම මෙමගින් අපේක්ෂා කෙරේ.
මෙම කොමිෂන් සභාව හරහා රාජ්ය නිලධාරීන්ගේ සහ විශ්රාමිකයන්ගේ වැටුප් සම්බන්ධයෙන් පවතින උග්ර ගැටලුවලට තිරසාර විසඳුම් ලබාදීම මෙන්ම, රාජ්ය සේවකයන්ගේ වෘත්තීය භාවය ඉහළ නැංවීම සඳහා අවශ්ය පියවර හඳුනා ගැනීම මූලික අරමුණ වේ.
විශේෂයෙන්ම වත්මන් ගෝලීය ප්රවණතා සහ නව තාක්ෂණික දියුණුවට අනුගත වන ආකාරයට රාජ්ය සේවය ප්රතිව්යුහගත කිරීම සඳහා නිර්දේශ ඉදිරිපත් කිරීමේ වගකීම මෙම කමිටුව වෙත පැවරී ඇත. මෙය දිගුකාලීනව රාජ්ය ආයතනවල කාර්යක්ෂමතාව ඉහළ නැංවීමටත්, රාජ්ය සේවක අභිමානය සුරැකීමටත් ඉවහල් වන වැදගත් පියවරක් ලෙස සැලකේ.
කොමිෂන් සභාව සඳහා පත් කර ඇති සාමාජිකයන් අතර ක්ෂේත්ර ගණනාවක විශේෂඥයන් සහ අත්දැකීම් බහුල පුද්ගලයන් ඇතුළත් වීම විශේෂත්වයකි. මෙම කොමිෂන් සභාවේ නිර්දේශ මත පදනම්ව රාජ්ය සේවයේ වැටුප් ව්යුහය සහ විශ්රාම වැටුප් ප්රතිපත්තිය ඉදිරියේදී වෙනස්කම්වලට ලක්විය හැකි අතර, එය මෙරට රාජ්ය පරිපාලන ක්ෂේත්රයේ තීරණාත්මක හැරවුම් ලක්ෂ්යයක් වනු ඇත.
රාජ්ය සේවය වඩාත් ජනතාවාදී සහ කාර්යක්ෂම සේවාවක් බවට පත් කිරීම සඳහා රජය ගෙන ඇති මෙම ක්රියාමාර්ගය සම්බන්ධයෙන් පාර්ශ්වයන්ගේ අපේක්ෂාවන් මේ වන විට ඉහළ මට්ටමක පවතී.
