ජාතික සංවර්ධන බැංකුවේ (NDB) සිදුව ඇති බව කියන බිලියන ගණනක මූල්ය වංචාවෙන් අනතුරුව, ජාත්යන්තර මූල්ය අරමුදල (IMF) ශ්රී ලංකා මහ බැංකුවට බැංකු අධීක්ෂණ සහ නියාමන ක්රමවේද තවදුරටත් ශක්තිමත් කරන ලෙස දැනුම් දී ඇත.
මෙම කරුණ අනාවරණය වූයේ සමගි ජන බලවේගයේ පාර්ලිමේන්තු මන්ත්රී ආචාර්ය හර්ෂ ද සිල්වාගේ සභාපතිත්වයෙන් රැස්වූ පොදු මුදල් පිළිබඳ කාරක සභාවේ සාකච්ඡාවකදීය.
එහිදී මහ බැංකු අධිපති ආචාර්ය නන්දලාල් වීරසිංහ ඇතුළු නිලධාරීන් NDB සිද්ධිය සම්බන්ධයෙන් කාරක සභාව දැනුවත් කළහ. මහ බැංකුව විසින් මේ දක්වා ගෙන ඇති ක්රියාමාර්ග පිළිබඳව විමසූ ආචාර්ය හර්ෂ ද සිල්වා මහතා, IMF හි පස්වන සහ හයවන සමාලෝචන වාර්තාවලද මහ බැංකුවේ අධීක්ෂණ හා නියාමන කාර්යභාරය තවදුරටත් ශක්තිමත් කිරීමේ අවශ්යතාව අවධාරණය කර ඇති බව සඳහන් කළේය.
සිද්ධියට අදාළ ගනුදෙනු සහ ඒවා සිදුවූ ආකාරය හඳුනා ගැනීම සඳහා අධිකරණ වෛද්ය විගණනයක්ආරම්භ කර ඇති බව මහ බැංකු නිලධාරීන් කාරක සභාවට දැනුම් දුන්හ.
එම විමර්ශනය මහ බැංකුව සහ NDB බැංකුව එක්ව සිදුකරන බවද ඔවුන් පැවසූහ. කෙසේ වෙතත්, ආචාර්ය හර්ෂ ද සිල්වා සහ කාරක සභා සාමාජික රවී කරුණානායක යන මහත්වරුන් ප්රශ්න කළේ, විමර්ශනයට ලක්වන ආයතනයක් වන NDB බැංකුව අධිකරණ වෛද්ය විගණනයේ විෂය පථය තීරණය කිරීමේ ක්රියාවලියට සම්බන්ධ වූයේ කෙසේද යන්නයි.
ඊට පිළිතුරු දුන් මහ බැංකු නිලධාරීන් සඳහන් කළේ, විමර්ශනයේ විෂය පථය අවසන් වශයෙන් තීරණය කර ඇත්තේ මහ බැංකුව බවත්, NDB බැංකුවෙන් ලබාගෙන ඇත්තේ මූලික කෙටුම්පත් යෝජනා පමණක් බවත්ය.
විමර්ශනයේ අතුරු වාර්තාව සතියක් ඇතුළත ඉදිරිපත් කිරීමට නියමිත අතර, අවසන් වාර්තාව ජූලි 18 වැනිදා භාරදීමට අපේක්ෂා කරන බවද නිලධාරීහු පැවසූහ. එම විමර්ශනය මගින් පසුගිය වසර දහයක කාලය තුළ සිදුවූ ගනුදෙනු පරීක්ෂාවට ලක් කෙරෙනු ඇත.
මීට පෙර වාර්තා වී තිබුණේ වංචනික ගනුදෙනු මාර්ගයෙන් NDB බැංකුවට රුපියල් බිලියන 13ක පමණ පාඩුවක් සිදුව ඇති බවයි.
මේ අතර, මහජන ආරක්ෂක අමාත්ය ආනන්ද විජේපාල මහතා පසුගිය සතියේ පාර්ලිමේන්තුවේදී ප්රකාශ කළේ මෙම සිද්ධියට අදාළ මුදල් විදේශගත කර ඇති බවට තොරතුරු අනාවරණය වී ඇති බවයි.
