පොලිස් නිලධාරීන්ට ගිනි අවි නිකුත් කර ඇත්තේ ඒවා සුරතල් කිරීමට නොව අවශ්ය විටෙක භාවිත කිරීමට බව මහජන ආරක්ෂක ඇමැති ටිරාන් අලස් මහතා පවසා තිබෙනවා.
ඒ ප්රජා පොලිස් දැනුවත් කිරීමේ වැඩසටහනක් ලෙස රත්නපුරයේ පැවති වැඩමුළුවක් අමතමින්.
මෙහිදී ඇමැති අලස් මහතා කියා සිටියේ තමන් මහජන ආරක්ෂාව පිළිබඳ ඇමැතිවරයා ලෙස කටයුතු කරන කාලය තුළ පාතාල ක්රියාකාරකම් අවසන් කිරීමට කටයුතු කරන බවයි.
“පාතාල චරිතවලට ඔවුන්ගේ නීති විරෝධී ක්රියා නවත්වන්න කියලා මම දිගින් දිගටම අවවාද කළා. ඔවුන් මගේ අනතුරු ඇඟවීමට අවනත වන්නේ නැත්නම්, අපි ඔවුන්ව අල්ලනවා. මෙම උවදුර තුරන් කිරීමට හැකි සෑම දෙයක්ම යොදවන ලෙස මම STF කමාන්ඩෝ භටයන්ට උපදෙස් දී තිබෙනවා. ඒ වගේම මම ඔවුන්ට දැඩිව කියා තිබෙනවා ඔවුන් තමන්ගේ කාර්යය කරන්න එහෙම නැත්නම් රස්සාව දාලා යන්න කියලා.මත්ද්රව්ය සම්බන්ධ වැරදිවලට සම්බන්ධ පුද්ගලයන් වර්ග තුනක් ඉන්නවා. මත්ද්රව්ය ජාවාරම් කරන මහා පරිමාණ වෙළෙඳුන් ඉන්නවා. නාවික හමුදාවට සහ පොලිස් බුද්ධි අංශවලට ඔවුන් සේවීම සහ ඔවුන්ගේ ජාල බිඳ දැමීමේ වගකීම පැවරී තිබෙනවා. ඊළඟට කුඩුකාරයෝ ඉන්නවා. තුන්වැනි කණ්ඩායම මත්ද්රව්ය බෙදාහැරීමේ ජාල පවත්වාගෙන යන අය. යුක්තිය මෙහෙයුමේ අරමුණ තුන්වැනි කණ්ඩායම සම්බන්ධයෙන් කටයුතු කිරීමයි ” බව අමාත්යවරයා පවසා තිබුණා.
මත්ද්රව්ය ව්යාපාරිකයන් සහ ඔවුන්ගේ ක්රියා සම්බන්ධයෙන් තමන් සතුව ඇති ඕනෑම තොරතුරක් ලබාදී පොලිසිය සමඟ සහයෝගයෙන් කටයුතු කරන ලෙස ජනතාවගෙන් ඉල්ලා සිටින බවත් මහජන ආරක්ෂක ඇමැතිවරයා ලෙස වැඩ භාරගත් විගස සියලුම නියෝජ්ය පොලිස්පතිවරුන් හමුවී මත්ද්රව්ය ජාවාරම්කරුවන්ට එරෙහිව දැඩි ක්රියාමාර්ග ගත යුතු බව ප්රකාශ කළ බවත් ඔහු තවදුරටත් සඳහන් කර තිබෙනවා.
