බංග්ලාදේශයේ හිටපු අගමැතිනි කලීඩා ෂියා ඇතුළු, සිර දඩුවම් විඳිමින් සිටි එරට විපක්ෂ දේශපාලන ක්රියාකාරීන් සියලු දෙනා නිදහස් කිරීමට බංග්ලාදේශ ජනාධිපති මොහොමඩ් ෂහබුදීන් නියෝග කර තිබෙනවා.
බංග්ලාදේශ ජනාධිපති මොහොමඩ් ෂහබුදීන් මෙසේ නියෝග කළේ, ශිෂ්ය විරෝධතා හමුවේ බංග්ලාදේශ අග්රාමාත්ය ෂෙයික් හසීනා ධුරයෙන් ඉල්ලා අස්වී රටින් පලා යෑමත්, හමුදාව එරට බලය අත්පත් කර ගැනීමත් සමඟයි.
හමුදාපති ජනරාල් වකාර් උස් සමාන්, නාවික හමුදාපති සහ ගුවන් හමුදාපති සමඟ එක් වී සාකච්ඡා පැවැත්වීමෙන් ද අනතුරුව බංග්ලාදේශ ජනාධිපතිවරයා මෙසේ නියෝග කළා.
මෙම හමුවට බංග්ලාදේශ ජාතික පක්ෂයේ සාමාජිකයන් සහ තවත් විපක්ෂ දේශපාලන පක්ෂයක් වන ජමාත් ඊ ඉස්ලාමී පක්ෂයේ සාමාජිකයන් ද එක් වී සිටි බව වාර්තා වනවා.
හමුදා ප්රධානියා ඊයේ (05) ජාතිය අමතා සිදු කළ විශේෂ ප්රකාශයේ සඳහන් කළේ, ෂෙයික් හසීනාගේ පලා යෑමෙන් පසු අන්තර්වාර රජයක් පිහිටුවීමට පියවර ගන්නා බවයි.
