ඩෙංගු අධි වසංගත තත්ත්වය තවමත් පාලනය වී නොමැති බව ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය පවසයි.
එහි වැඩබලන සභාපති උපුල් රෝහණ මහතා පැවසුවේ පළමුව වසංගත තත්ත්ව වාර්තා වූ ප්‍රදේශවලින් මේ වන විට වසංගත තත්ත්වය යම් තරමක් පාලනය වෙමින් පැවතියද නව ප්‍රදේශවල ඩෙංගු වසංගත තත්ත්ව වාර්තා වෙමින් පවතින බවය.
මේ හේතුවෙන් ඩෙංගු මර්දනය සඳහා මහජනතාව ඇතිකරගත් උනන්දුව කිසිසේත් අඩුකරගත යුතු නොවන බවද උපුල් රෝහණ මහතා මෙහිදි මහජනතාවට දැනුම් දුන්නේය.
දැනට පවතින කාලගුණික තත්ත්වයන් හමුවේ ඇතැම් ප්‍රදේශවලට මද වැසි ආරම්භ වී ඇති බවත් මේ හේතුවෙන් මදුරු ගණත්වය තවදුරටත් වර්ධනය වී පවතින තත්ත්වය තව දුරටත් වර්ධනය වීමේ අවධානමක් පවතින බවද ඒ මහතා සඳහන් කළේය.
එමෙන්ම මේ වන විට ඩෙංගු රෝගය මර්දනය කිරීම සඳහා ප්‍රධාන වශයෙන් බාදකයක් වී ඇත්තේ හිමිකරුවන් නොමැති නිවාස බවත් එහිදී හිමිකරුවන් විදේශගතවූ සහ නගරාශ්‍රිතව ඉඩම් සහ නිවාස මිලදී ගෙන එහි පදිංචිකරුවන් නොමැති ස්ථාන විශාල ගැටලුවක් බවට මේ වන විට පත්ව ඇතැයිද ඒ මහතා පෙන්වා දුන්නේය.
