එළඹෙන පොසොන් උත්සව සමය තුළ දිවයින පුරා පවත්වනු ලබන දන්සල්, තොරණ සහ පහන් කූඩු ප්‍රදර්ශන අසල සිදුවිය හැකි අධික රථ වාහන තදබදය සහ මහජන පීඩාව අවම කිරීම සඳහා පොලිස් මූලස්ථානය විශේෂ මෙහෙයුම් මාලාවක් සූදානම් කර තිබේ.
විශේෂයෙන් මීට පෙර පැවති උත්සව අවස්ථාවලදී අවිධිමත් ලෙස දන්සල් සංවිධානය කිරීම හේතුවෙන් ප්‍රධාන මාර්ගවල ගමනාගමනයට බරපතළ බාධා එල්ල වූ බව නිරීක්ෂණය වී ඇති බැවින්, මෙවර ඒ සම්බන්ධයෙන් සියලුම පොලිස් ස්ථානාධිපතිවරුන් වෙත දැඩි මාර්ගෝපදේශ නිකුත් කිරීමට පියවර ගෙන ඇත. ආගමික සහ සමාජීය කටයුතුවලට බාධා කිරීම රජයේ අරමුණ නොවන නමුත්, මහජනතාවගේ ගමනාගමන අයිතිය සුරක්ෂිත වන පරිදි විනයගරුකව මෙම කටයුතු සංවිධානය කිරීම අනිවාර්ය බව රථ වාහන නියෝජ්‍ය පොලිස්පති W.P.J. සේනාධීර මහතා අවධාරණය කරයි.
මාර්ග ආරක්ෂාව තහවුරු කිරීමේ ක්‍රියාවලියේදී රියදුරු බලපත්‍ර ලබා ගැනීමේ පුහුණු වීම් පවා නීත්‍යානුකූල බලපත්‍රලාභීන්ගේ අධීක්ෂණය යටතේම සිදුවිය යුතු බවත්, එසේ නොවන අයට එරෙහිව කිසිදු සහනයකින් තොරව නීතිය ක්‍රියාත්මක කරන බවත් පොලිසිය ප්‍රකාශ කරයි.
වර්තමානය වන විට රථ වාහන නීති සහ මාර්ග සංඥා පිළිබඳ අවම අවබෝධයකින් තොරව මාර්ගයට පිවිසෙන රියදුරන් හේතුවෙන් අනතුරු සංඛ්‍යාව ඉහළ ගොස් ඇති අතර, විශේෂයෙන්ම මැයි මස පළමුවැනිදා සිට බලාත්මක වූ ඩිජිටල් රක්ෂණ කාඩ්පත් පරීක්ෂා කිරීමේ නව ක්‍රමවේදය පිළිබඳව ද සියලු නිලධාරීන් දැනුවත් කර තිබේ. ස්මාර්ට් ජංගම දුරකථනයක් නොමැති වුවද සාමාන්‍ය දුරකථනයක් හරහා *138# අංකය ඇමතීමෙන් රක්ෂණාවරණයේ වලංගුභාවය තහවුරු කර ගැනීමට මහජනතාවට සහ පොලිස් නිලධාරීන්ට දැන් අවස්ථාව පවතින බව මෙහිදී වැඩිදුරටත් අනාවරණය විය.
පොසොන් සතිය තුළ දිවා රාෑ ක්‍රියාත්මක වන පරිදි විශේෂ මුර සංචාර සහ වැටලීම් සිදු කිරීමට සැලසුම් කර ඇති අතර, එහිදී විශේෂයෙන්ම යතුරුපැදි සහ ත්‍රිරෝද රථ ධාවනය කරන තරුණ ප්‍රජාව කෙරෙහි වැඩි අවධානයක් යොමු කෙරේ. නිෂ්පාදකයා විසින් ලබාදෙන ප්‍රමිතියෙන් බැහැරව විකරණය කරන ලද වාහන ධාවනය කිරීම සහ වේග සීමා උල්ලංඝනය කිරීම් මැඩපැවැත්වීම සඳහා පොලිස් නිලධාරීන් විශේෂ මෙහෙයුම් දියත් කිරීමට තීරණය කර ඇත.
මාර්ග ආචාර ධර්ම සුරකිමින් සහ බලධාරීන් ලබාදෙන උපදෙස් පිළිපදිමින් කටයුතු කිරීමට මහජනතාව ලබාදෙන සහයෝගය අගය කරන බව පවසන පොලිස් දෙපාර්තමේන්තුව, උත්සව සිරිය පීඩාකාරී අත්දැකීමක් කර නොගන්නා ලෙස සමස්ත ජනතාවගෙන් කාරුණිකව ඉල්ලා සිටියි.
