අමෙරිකාවේ බැල්ටිමෝර්හි පාලමක ගැටී අනතුරට පත් ශ්‍රී ලංකාව බලා යාත්‍රා කරමින් පැවැති නෞකාව තුළ ටොන් 746ක බර විෂ සහිත අපද්‍රව්‍ය ප්‍රවාහනය කරමින් පැවති බව අමෙරිකානු මාධ්‍ය වාර්තා කරනවා.
අමෙරිකාවේ බැල්ටිමෝර්හි ෆ්‍රැන්සිස් ස්කොට් කී පාලමේ ගැටී අනතුරට ලක්වූ ද ඩාලි බහාලුම් ප්‍රවාහන නෞකාව එම අනතුර සිදුවන විට ශ්‍රී ලංකාව බලා යාත්‍රා කරමින් පැවතියා.
අඩි 984ක් දිගින් යුතු එම නෞකාව තුළ විෂ ද්‍රව්‍ය රැගත් බහාලුම් 56ක් තිබී ඇති බව අමෙරිකානු මාධ්‍ය වාර්තා කරනවා.
ඔවුන්ට අනුව ඒ තුළ ටොන් 746ක් බරැති, විඛාදන, ගිනි ගන්නා සුළු, සංකීර්ණ ද්‍රව්‍ය සහ ප්‍රවාහනයේදී සැලකිලිමත්විය යුතු පුපුරන ද්‍රව්‍ය, ලිතියම් අයන් බැටරි ද තිබී ඇතැයි සඳහන්.
විදෙස් මාධ්‍ය වැඩිදුරටත් වාර්තා කරන්නේ, අනතුර සිදුවූ අවස්ථාවේදී අදාළ බහාලුම්වලින් 14ක් ගංගාවට ඇදවැටී ඇති බවයි.
නෞකාව මත ඇති අනෙක් බහාලුම් 4,644 සම්බන්ධයෙන් අමෙරිකානු ප්‍රවාහන ආරක්ෂක මණ්ඩලය විමර්ශන සිදුකරමින් පවතිනවා.
පැටැප්ස්කෝ ගංගාවේ ජලයේ ගුණාත්මකභාවය සම්බන්ධව ගැටලු මතුව ඇති බවද වාර්තා වනවා.
