ජනතා විමුක්ති පෙරමුණ (JVP) සහ චීන කොමියුනිස්ට් පක්ෂය (CPC) අතර පවතින ද්විපාර්ශ්වික සබඳතා, 2025 වසරේ මුල් භාගයේදී ජනාධිපති අනුර කුමාර දිසානායක මහතා චීනයේ නිරත වූ නිල සංචාරයේදී අත්සන් තැබූ අවබෝධතා ගිවිසුම (MoU) හරහා තවදුරටත් ශක්තිමත් වී ඇති බව ජවිපෙ ප්රධාන ලේකම් ටිල්වින් සිල්වා මහතා පවසයි.
චීන කොමියුනිස්ට් පක්ෂය පිහිටුවීමේ 105 වැනි සංවත්සරය නිමිත්තෙන් කොළඹදී පැවැති උත්සවයක් අමතමින් ඒ මහතා මේ බව සඳහන් කළේය.
එම අවබෝධතා ගිවිසුම හේතුවෙන් දැනටමත් ජනතා විමුක්ති පෙරමුණේ සහ ජාතික ජන බලවේගයේ (NPP) ක්රියාකාරීන් රැසකට චීනයේ අධ්යයන සහ පුහුණු වැඩසටහන් සඳහා සහභාගී වීමට අවස්ථාව ලැබී ඇති බවත්, ඉදිරියේදී තවදුරටත් මෙවැනි අධ්යාපනික හුවමාරු වැඩසටහන් ක්රියාත්මක කිරීමට සැලසුම් කර ඇති බවත් ලේකම්වරයා පෙන්වා දුන්නේය.
චීන කොමියුනිස්ට් පක්ෂය ලංකාවේ ජනතා විමුක්ති පෙරමුණ සමඟ ඉතා සමීපව කටයුතු කිරීම අගය කරන බව ද ඔහු මෙහිදී කියා සිටියේය.
මාඕ සේතුං, ඩෙන් ෂියාඕපිං සහ වත්මන් චීන ජනාධිපති ෂී ජින්පිංගේ නායකත්වය යටතේ චීනය අර්ධ වැඩවසම් සමාජයක සිට ලොව බලවත්ම රාජ්යයක් දක්වා පරිවර්තනය වූ අයුරු මෙහිදී ඇගයීමට ලක් විය.
විශේෂයෙන්ම 1978 ආර්ථික ප්රතිසංස්කරණ, “චීන ලක්ෂණ සහිත සමාජවාදී” සංවර්ධන ආකෘතිය මඟින් චීනය ලොව දෙවැනි විශාලතම ආර්ථිකය බවට පත්වීම සහ මිලියන 100කට අධික ග්රාමීය ජනතාවක් අන්ත දුප්පත්කමින් මුදාගැනීම සමස්ත ලෝකයටම ආදර්ශයක් බව ද ටිල්වින් සිල්වා මහතා වැඩිදුරටත් අවධාරණය කළේය.
